എം ബി ബി സ് ചെയ്യുന്നതിനിടെ ഒരിക്കൽ തിരുവനന്തപുരത്ത് പോവേണ്ടി വന്നു. ട്രെയിനിൽ വച്ച് പഴയ ബാല്യ കാല സഹപാഠി യെ വീണ്ടും കണ്ടു. പേര് മൈനക്.
“എന്തുട്ടാ ഗെഡ്യെ?” ജാതി വർത്താനം ഒക്കെ കഴിഞ്ഞു.
അവൻ ബി കോം റാങ്കോടെ പാസായി എം ബി എ ക്കോ ഒക്കെ പോകാൻ തയ്യാർ എടുത്തിരിക്കുന്നു.
സ്‌കൂളിൽ വച്ച് വല്യ ഗടി ഒന്നും ആയിരുന്നില്ല. മാഡൽ ബോയ്സിൽ ആണല്ലോ ഞാൻ പഠിച്ചത്. ഇടക്ക് അടിയൊക്കെ കൂടും.
കൂടണമല്ലോ . ഇടക്ക് കൂടിയില്ലെങ്കില്ലെങ്കിൽ പിള്ളേരുടെ ഇടയിൽ ഒരു വെയിറ്റ് കിട്ടില്ല .
“ഒരു വൈറ്റൂല്യ , ഷ്ടോ “- അതാണ് .
ഇടക്ക് രണ്ടു പെഡ് യാ പെടക്കണം . ആരെ എങ്കിലും മതി . ഏതെങ്കിലും ഒരു ചുള്ളനെ വല്ലപ്പഴും ഒന്ന് പൂശില്ലെങ്കി ആണാണെന്ന് സമ്മതിച്ചു തരൂല്ല . പ്രത്യേകിച്ചും ഒരു പഠിപ്പിസ്റ് ആണെങ്കിൽ . ഈ ആണുങ്ങൾ ആയി നിൽക്കുന്നതിന്റെ ഒരു പാടേ .
ഇതിനു ചില അടവ് നയങ്ങൾ ഒക്കെയുണ്ട് . തീരെ പാവങ്ങൾ , അഥവാ ആരോഗ്യം കുറഞ്ഞതുങ്ങളെ ഇടയ്ക്കിടെ പൂശാം . പക്ഷെ അത് എല്ലാരും ചെയ്യുന്നതാണല്ലോ . മാത്രമല്ല , അത് കൊണ്ട് ഉദ്ദേശിച്ച എഫെക്ട് കിട്ടില്ല . മാത്രവുമല്ല – കഷ്ടവുമാണ് . നേരെ എതിര് എഫെക്ട് വന്നു എന്നും വരാം .
“അയ്യേ – ആ ജിമ്മേണ്ടല്ല – ആ പാവത്തിനെ പിടിച്ച പൂശിഷ്ടോ .”
“ആണാ? നാണല്ലേ അവന് ? ജാതി ഊമ്പൻ ഷ്ടോ .”
പോരെ പൂരം .
നമ്മുടെ മണ ഗാങ് ഉണ്ടാക്കാം . അലമ്പന്മാരും ബാക്കി എല്ലാരും പേടിക്കുന്നവരും ആണ് ‘മണ’ ഗാങ് . എന്തിട്ടാ ഈ മണ ? അതൊന്നും ചോദിക്കരുത് . ഈ വാക്കോളൊന്നും ഞാൻ ഉണ്ടാക്കുന്നതല്ല . ജയേഷ് , പ്രേം ജിത് ലാൽ തുടങ്ങിയ കുറെ പൊക്കവും വണ്ണവും ഉള്ള ആളുകൾ എന്റെ ‘സോൾ ഗഡീസ്’ ആണ് . ഇതാണ് എന്റെ മണ ഗാങ് . ഈ മണ ഗാങ്ങിന്റെ ബലത്തിൽ കുറെ നാൾ വിലസി . സ്വരനെ ഒക്കെ ഇടിച്ചു പപ്പടമാക്കി . ഇവർ കൂടെ ഉണ്ടെങ്കിൽ ക്ലാസ്സിലെ ഏറ്റവും പൊക്കം ഉള്ളവനും മസ്സിലനും ആയ രഞ്ജിത്തിനെ വരെ ഈ ഞാൻ “പോടാ ശാവ്യെ ” എന്ന് തൊണ്ടിയിട്ടുണ്ട് .
അതാണ് പ്രശ്നം ആയത് .
ഒരിക്കൽ , എട്ടാം ക്ലാസിൽ വെച്ചാണെന്ന് തോന്നുന്നു . ജയേഷും പ്രേം ജിത് ലാലും വന്നിട്ടില്ല . രഞ്ജിത്ത് എന്റടുത്തു വന്നു , കവിളിനിട്ടൊരു കുത്ത് . ” എന്തുട്ടണ്ട ഉണ്ടേ ” എന്ന് . “ജാതി നെയ്യുണ്ട തന്നെ നിയ്യ് ” എന്നും പറഞ്ഞു .
ഉണ്ടയെ – ഉണ്ട . ഒന്നാമതെ എനിക്ക് അത്യാവശ്യം പൊക്കം ഉണ്ടെന്ന് ഞാൻ ഉറച്ചു വിശ്വസിക്കുന്നു . രണ്ടാമത് , എനിക്ക് വലിയ തടി ഒന്നുമില്ല . ഇനി ഉണ്ടെങ്കിൽ തന്നെ മൊത്തം ബ്രൂ സി ലി യുടെ പോലത്തെ ഉറച്ച മസ്സിൽ ആണ് . നെയ്യുണ്ടാ പോലും . അവലോസുണ്ട എന്ന് വിളിച്ചിരുന്നെങ്കിൽ പിന്നേം സഹിക്കാമായിരുന്നു .
ഞാൻ ചുറ്റും നോക്കി . ജയേഷും പ്രേം ജിത്തും എന്തായാലും ഇല്ല . പിന്നെ ഉള്ളത് ഒരു സ്ട്രാറ്റജിക് കളി ആണ് .
ചുറ്റും നമ്മുടെ ക്‌ളാസിൽ ഉള്ള കുറെ പേര് ഉണ്ടെങ്കിൽ അടി തുടങ്ങി അധികം കഴിയും മുൻപേ ആരെങ്കിലും ഒക്കെ കൂട്ടം ചേർന്ന് അടി കൂടുന്നവരെ പിടിച്ചു മാറ്റും . ഇവിടെ ഞാൻ നോക്കുമ്പോൾ പിടിച്ചു മാറ്റാൻ സാധ്യത ഉള്ള , സ്ഥിരം സമാധാന കാംക്ഷികളായ കുറെ എണ്ണം ചുറ്റും ഉണ്ട് . എന്റെ അത്യാഗ്രഹം ഉണർന്നു . ഏതാനും സെക്കൻഡുകൾ പിടിച്ചു നിന്നാൽ മതി . രഞ്ജിത്തിനെ – അതി ഭയങ്കരനും ദൃഢ ഗാത്രനും ആർനോൾഡ് ശിവ ശങ്കരന്റെ അളിയനും ആയ രഞ്ജിത്തിനെ അടിച്ചു എന്ന ഖ്യാതി കിട്ടുകയും ചെയ്യും . ചുമ്മാ മണ ഗാങ്ങിന്റെ ബലത്തിൽ പിടിച്ചു നിക്കുന്നവൻ എന്ന ചീത്ത പേര് പോയും കിട്ടും
. ചാടി മോന്തക്കിട്ട് ഒരു പെടയാ പെടച്ചു .
സംഭവം കൈ വിട്ടു പോയി . രഞ്ജിത്ത് ടപ്പേ ടപ്പേ എന്ന് അടി തുടങ്ങി . ഞാൻ ചാടി കഴുത്തിൽ പിടുത്തമിട്ടു . അവൻ നിവർന്നു നിന്നു . ഞാൻ ആകാശത്തിലേക്ക് പൊങ്ങി . ഒരു മാല പോലെ രഞ്ജിത്തിന്റെ കഴുത്തിൽ തൂങ്ങി കിടക്കുക ആണ് .
ഹാർട് പട പട ഇടിക്കുന്നു . ചുറ്റും പാളി നോക്കി – പിടിച്ചു മാറ്റഡ ശവ്യോളേ- മനസ്സിൽ അലറി . ഹാവൂ – കുറെ പേര് പിടിച്ചു മാറ്റാൻ ഓടി അടുക്ക്ന്നുണ്ട്.
അപ്പോഴാണ് പെട്ടന്ന് മൈനക് അവിടെ എത്തുന്നത് . പിടിച്ചു മാറ്റാൻ വന്നവരെ അവൻ തടഞ്ഞു .
“ആരും പിടിച്ചു മാറ്റരുത് . തല്ല്യാ തീർക്കട്ടെ . മാറ്റരുതെന്ന്‌ – ഇത് അവരടെ പ്രശ്നല്ലേ …”
കോ …..കോ ..മാങ്ങൻ. സ്ഥിരം കണക്ക് ഹോം വർക്ക് എന്റെ കോപ്പി അടിക്കുന്നവൻ ആണ് .
അന്നീ മൈനക് എന്ന മണ കൊണാഞ്ചൻ കാരണം എനിക്ക് കണക്കിന് കിട്ടി . മണ ഗാങ് ഇല്ലല്ലോ . ഏതോ ഒരു മാഷ് ആ വഴി വന്നപ്പോഴാണ് ഞാൻ നിലത്തു തന്നെ ഇറങ്ങിയത് .
ആ മൈനക് ആണ് ഇവൻ. ഈ സംഭവം ഒക്കെ നമുക്ക് ഓർമയുണ്ടല്ലോ . പക്ഷെ അതിനെ പാട്ടി ഒന്നും മിണ്ടാതെ പഴേ കഥകൾ ഒക്കെ പറഞ്ഞു ഇങ്ങനെ ഇരുന്നു .
ട്രെയിൻ ഏതോ ഒരു സ്റ്റേഷനിൽ നിർത്തി . അവിടെ ഒരു മിനിറ്റോ മറ്റോ ഉള്ളു സ്റ്റോപ്പ് . ജനലിലൂടെ നോക്കുമ്പോൾ പ്ലാറ്റുഫോമിൽ ഒരു ബഹളം . ഏതോ ഒരു മനുഷ്യനെ നാലഞ്ചു പേര് ചേർന്ന് അടിച്ചു പഞ്ചറാക്കുന്നു . മുഖത്ത് മേടുന്നു . വീണിടത്തു കിടത്തി വയറ്റത്ത് ചവിട്ടുന്നു .
നമ്മുടെ മൈനക് ചാടി എണീറ്റു . മുഖത്ത് ആവേശ തിര തള്ളൽ . ട്രെയിനിൽ നിന്ന് ചാടി ഇറങ്ങി . ഓടി ചെന്ന് , ഈ വീണു കിടക്കുന്നവനെ രണ്ടു ചവിട്ട് ! പിന്നെ മുടി പിടിച്ചു തല നിലത്ത് ഒരു കുത്ത് !
അപ്പോഴേക്കും ട്രെയിൻ നീങ്ങി തുടങ്ങി . മൈനക് ഓടി തിരിച്ചു കയറി . ഒന്നും സംഭവിക്കാത്ത മാതിരി ഇരിപ്പായി .
“നീ എന്തിനാടാ അയാളെ ചവിട്ടിയത് ?” ഞാൻ ചോദിച്ചു .
“ഓ – ഒരു കാരണോം ഇല്ലാതെ ആരേം അടിക്കില്ല്യല്ലോ- ല്ലേ . അപ്പൊ നമ്മളും ഒരു സഹായം ..” അവൻ വെളുക്കെ ചിരിച്ചു .
“അത്രേള്ളോ ?”
“അത്രേല്ലൊ- മ്മക്ക് ത്രേ ല്ലേ പറ്റൂ .”
ഈ മൈനക് ഇപ്പൊ എവിട്യണാവോ? ആരോ പറഞ്ഞത് കേട്ട് – കാനഡ യിലോ എന്തോ ബേക്കറി നടത്തുക ആണത്രേ . നല്ല തങ്കപ്പെട്ട മനുഷ്യൻ . (ജിമ്മി മാത്യു )
