എന്ത് ചെയ്യാഷ്ടോ. ഞങ്ങൾ ക്രിസ്ത്യാനികൾ, സ്വാതന്ത്ര്യം കിട്ടുമ്പോൾ ഉള്ള കണക്ക് അനുസരിച്ചു ജനസംഖ്യയുടെ2 .5 ശതമാനം ആയിരുന്നു . അതിനു ശേഷം എന്തൊക്കെ സർക്കസ്സുകൾ കാട്ടി ? ഇന്ത്യ മൊത്തം പള്ളികൾ പണിതു . ആശുപത്രികളും സ്‌കൂളുകളും സ്ഥാപിച്ചു . നാട്ടുകാരെ സേവിച്ചു (അതായത് സേവിക്കുന്നത് പോലെ മതം മാറ്റാനായി അഭിനയിച്ചു . ഗുണം കിട്ടിയെങ്കിലും എന്ത് കാര്യം ? മതം മാറ്റാൻ ആയിരുന്നില്ലേ അതൊക്കെ ? അന്താരാഷ്‌ട്ര ഗൂഡാലോചനയുടെ ഭാഗമായി നോബൽ പ്രൈസ അടക്കം വാങ്ങിച്ചു കൊടുത്തു എന്നൊക്കെ ചില പൊണ്ണന്മാർ ..ഛെ ..പാണന്മാർ പാടി നടക്കുന്നുണ്ട് ).ഇതൊക്കെ ചെയ്യുമ്പോൾ നമ്മുടെ വിചാരം എന്താ ? ഇപ്പൊ ഒരു ഇരുപത്തഞ്ചു ശതമാനം എങ്കിലും ക്രിസ്ത്യാനികൾ ആയി കഴിഞ്ഞു കാണും എന്നല്ലേ ?
2011 സെൻസസ് നോക്ക് – ക്രിസ്ത്യാനികൾ ഇന്ത്യയുടെ ജനസംഖ്യയുടെ …..2 . 5 ശതമാനം .
പിന്നേം ശങ്കരൻ …..അല്ല ….പൗലോസ് – തെങ്ങേ തന്നെ 🙁
ആലോചിക്കുമ്പ എന്റെ ക്രീഡാപ്പി രക്തം തിളക്കുന്നു . ഈ അച്ചന്മാരോടൊക്കെ എനിക്ക് ഒന്നേ ചോദിക്കാനുള്ളു :
ഈ പത്തറുപത് കൊല്ലായിട്ട് എന്തൂട്ട് പൂട്ട നിങ്ങള് ചെയ്തോണ്ടിരുന്നേ ? ഈ പള്ളി , ആസ്പത്രി , സേവനം സമയത് വല്ല റബറും വച്ചിരുന്നെങ്കിൽ ഇപ്പൊ ഇന്ത്യ മഹാ രാജ്യത്തെ റബ്ബർപാലിൽ മുക്കി മാമോദീസ ചെയ്യാമായിരുന്നു .
എന്ത് ചെയ്യും എന്ന് ഞങ്ങൾ പലരും the christian truth എന്ന് സീക്രട് ഗ്രൂപ് ഒക്കെ ഉണ്ടാക്കി ഡിസ് കുസ് ചെയ്തു . കിം ഫലം .
ബോധവത്കരിച്ചു മതം മാറ്റാൻ എളുപ്പമല്ല ഇക്കാലത് . ആർക്കും ഇതിലൊന്നും ഒരു താലപര്യവുമില്ല . മത കാര്യങ്ങളിൽ താല്പര്യമുള്ള ആളുകൾ ഒക്കെ വേറെ മതങ്ങളിൽ ഭയങ്കര ആക്റ്റീവ് ആണ് .
പിന്നെ ഞാൻ ഒരു രഹസ്യം പറയാം . സംഗതി ഞാൻ ക്രീഡാപ്പി ആയതു തന്നെ നമ്പൂതിരിമാരെ മാമോദീസാ സെൻതോമാസ്‌ നേരിട്ട് വന്നു ചെയ്ത വരുടെ പിന്തലമുറക്കാരൻ ആയതു കൊണ്ടാണ് . അഭിമാനം വേണം . അഭിമാനം . എന്നാലും ഒരു കുഴപ്പമുണ്ട് . ഞങ്ങൾ പേടിത്തൊണ്ടന്മാർ ആണ് !
“ഓങ്ങിയതല്ലേ ചിറ്റപ്പാ , ഇരിക്കട്ടെ ” – എന്നും പറഞ്ഞു കത്തിയെടുത്തു കുത്തുന്ന പാലാക്കാരൻമാർ ഒന്നും ഇപ്പൊ ഇല്ല . ഉള്ള റബ്ബർ വെട്ടുന്ന കത്തി തന്നെ എടുത്ത് ബംഗാളികൾക്ക് കൊടുത്തിരിക്കുകയാണ് . റബറിനു വില ഇലാത്ത കൊണ്ട് കാശും ഇല്ല .
കാശ് ഉണ്ടെങ്കിൽ തന്നെ സ്വന്തം കാര്യത്തിനെ കാശ് പുറത്തു വരൂ . അതെന്താണെന്ന് അറിയില്ല . പാരമ്പര്യമായി ഉള്ളതാണ് ഈ താടി വളർച്ച .
ഇത് കൊണ്ടൊക്കെ തന്നെ അടി തട , കാശിറക്കി കളി , ഇതൊന്നും നമ്മക്ക് പറഞ്ഞിട്ടുള്ളതല്ല .
പിന്നെ ഉള്ളത് ലോവ് ജിഹാദ് ആണ് . ചുള്ളന്മാർ ഇല്ലാതില്ല . എന്നാലും കടലിൽ കായം കലക്കിയത് പോലെയേ ആകുക ഉള്ളു .
അപ്പൊ എന്ത് ചെയ്യും ? ഐഡിയ ഉണ്ട് ? എന്താണെന്നല്ലേ ?
പ്രാർത്ഥന !
അതായത് – ദൈവത്തിനു എന്തും സാധിക്കും . എങ്ങനെ എന്ന് ചോദിക്കരുത് . അങ്ങനെ ചോദിക്കുന്നത് തന്നെ വിശ്വാസം ഇല്ലായ്മ ആണ് . ദൈവം ഇന്ത്യയെ ഒരു ക്രിസ്ത്യൻ ഇന്ത്യ ആക്കും .
ആഹഹാ – ഓർക്കാൻ തന്നെ എന്ത് സുഖം . എവിടെ നോക്കിയാലും പള്ളികൾ . തിരിയുന്നിടത്തു കുഞ്ഞു കുഞ്ഞു ആശുപത്രികൾ . പിന്നെ മുക്കിലും മൂലക്കും ചെറു സ്‌കൂളുകൾ . രാഷ്ട്ര ഭാഷ സുറിയാനി . രാഷ്ട്ര മൃഗം ജോർജേട്ടൻ പുന്യാളൻറെ കുതിര .
പിന്നെ കാടൻ നിയമം . കുരിശുകൾ . ചെറു കപ്പേളകൾ വാരി വിതറിയിരിക്കുന്നു . ഐ മീൻ – കാനൻ നിയമം .
അങ്ങനെ സമാധാനം ആയി പ്രാർത്ഥിച്ചോണ്ട് ഇരിക്കുമ്പോൾ ആണ് ഒരു സ്വത്വ പ്രതിസന്ധി ഉടലെടുക്കുന്നത് !
ഭയങ്കര പ്രതിസന്ധി !
ഒരു പുസ്തകം വായിച്ചു . വല്ല കാര്യവുമുണ്ടോ ? സോഷ്യൽ സ്ട്രെറ്റിഫിക്കേഷൻ എന്ന ഒരു പൊത്തകത്തിൽ ഫുള്ളർ എന്ന ഒരു കാലമാടൻ കാസ്റ്റ് ആൻഡ് ക്രിസ്ത്യാനിറ്റി യെ പറ്റി സായിപ്പന്മാർ പഠിച്ചത് അനുസരിച്ചു പഠനങ്ങൾ ഒക്കെ കോട്ട് ചെയ്ത് അർത്ഥ ശങ്കക്ക് ഇടയില്ലാത്ത വിധം പറഞ്ഞിരിക്കുന്നു :
കേരളത്തിലെ ജാതി വിഭാഗങ്ങൾ ആണ് ക്രിസ്ത്യാനികൾ ! മൂന്ന് ജാതികൾ പ്രധാനം ആയി ഉണ്ടത്രേ :
ഒന്ന് – സുറിയാനി ക്രിസ്ത്യാനികൾ (റോമൻ കത്തോലിക്കരും അല്ലാത്തവരും )
രണ്ടു – ലാറ്റിൻ കത്തോലിക്കർ എന്ന റോമൻ കത്തോലിക്കർ .
മൂന്ന് – മറ്റേ കുറെ പുതിയ ക്രിസ്ത്യാനികൾ .
ദേ കിടക്കണ് – ഞാൻ എന്റെ ഉള്ളിന്റെ ഉള്ളിൽ നോക്കി – എനിക്ക് പഴയ ഹിന്ദുക്കൾ നസ്രാണി മാപ്പിള എന്നും , സായിപ്പന്മാർ സുറിയാനി ക്രിസ്ത്യാനികൾ എന്ന് പറയുന്ന സ്വന്തം വിഭാഗത്തോട് മാത്രമേ കൂറ് ഉള്ളു !
അപ്പൊ ഈ ബാക്കി ഉള്ള പലവക ക്രിസ്ത്യാനികൾ ചേർത്ത് ഒരു ക്രിസ്ത്യാനി ഇന്ത്യ എനിക്ക് വേണ്ട .
ഞെട്ടലോടെ ഞാൻ ആ സത്യം മനസ്സിലാക്കി – ഞാൻ ക്രീഡാപ്പി അല്ല – നസ്രാപ്പി ആണ് , നസ്രാപ്പി .
ഇനി ഒന്നും ചെയ്യാൻ പറ്റില്ല . ദൈവം ഒരു നസ്രാണി മാപ്പിള ആകാൻ ഒരു സാധ്യതയും ഇല്ല . മാത്രം അല്ല – ജാതിയിലോട്ട് എങ്ങനെ മതം മാറ്റും ? അത് നടപ്പില്ല . ഈ ഫോറെസ്റ് എങ്ങനെ കാട് ആക്കും ? അത് പറ്റില്ല .
എല്ലാ ആശകളും തീർന്നു . സിംഹങ്ങൾ ആയ ഞങ്ങൾക്ക് സിംഹ വാലൻ കുരങ്ങിന്റെ അവസ്ഥ ആണ് . വംശ നാശ ഭീഷണി നേരിടുന്നു .
ഇനി ഒരു പ്രാർത്ഥന മാത്രമേ എനിക്കുള്ളൂ :
ദൈവമേ – സ്വർഗത്തിൽ ഒരു നസ്രാണി മാപ്പിള സ്ഥലം സ്റ്റൈലിൽ ഡിസൈൻ ചെയ്തു തരണം . മറ്റേ ക്രിസ്ത്യാനികളെ ദയവു ചെയ്തു കേറ്റരുത് . ചില ഹിന്ദുക്കളെ, മുസ്ലീങ്ങളെ ഒക്കെ കേറ്റാം . അവരുടെ പേര് ഞാൻ ചെവിയിൽ പറഞ്ഞു തരാം .
പിന്നെ സിംഗിൾ മാൾട്ട് ഒഴുകുന്ന ഒരു ചെറു അരുവി , ബോറടി മാറ്റാൻ ഒരു വോഡ്ക കുളം . ബീഫ് ഫ്രൈ അടക്കം ഉള്ള ടച്ചിങ്‌സ് തന്നെ ഉണ്ടായി വരുന്ന ഒരു മരം . ഇത്രേം അതിൽ വേണം . പിന്നെ ഫേസ്ബുക്കും നസ്രപ്പി തിങ്കേഴ്‌സ് എന്ന ഒരു സീക്രട് ഗ്രൂപ്പും അനുവദിച്ചു തരണം .
ഒരു മൂലക്ക് അഞ്ചാറു മൂഡ് കപ്പേം . (ജിമ്മി മാത്യു )
