കറുത്ത മരണവും ഈ ജൂതന്മാരും- ഊളത്തരങ്ങൾ ആവർത്തിക്കരുതേ .

മനുഷ്യൻ ഉണ്ടായിരുന്ന കാലത്തോളം പകർച്ച വ്യാധികളും ഉണ്ടായിരുന്നിരിക്കണം . ചരിത്ര രേഖകൾ ഉണ്ടായിരുന്ന കാലം തൊട്ട് , കോളറ , സ്മാൾ പോക്സ്, പിന്നെ അനേകം പേരറിയാത്ത രോഗങ്ങൾ എന്നിവ, പെട്ടന്ന് പടർന്നു പിടിക്കുന്ന വ്യാധികൾ ഉണ്ടാക്കി മനുഷ്യരെ കൂട്ടത്തോടെ കൊന്നൊടുക്കി .

ദയയും ദാക്ഷിണ്യവുമില്ലാതെ . രാജാവിനെയും അടിമയെയും നോക്കാതെ . കയ്യും കണക്കുമില്ലാതെ .

അതിൽ , ചരിത്ര രേഖകളിൽ തെളിഞ്ഞു കാണുന്ന ഒന്നാണ് , യെർസീനിയ പെസ്റ്റിസ് എന്ന ബാക്ടീരിയ ഉണ്ടാക്കുന്ന പ്ളേഗ് എന്ന മഹാമാരി .

സംഗതി സിംപിൾ ആണ് . അണു ഇങ്ങനെ കാടൻ ഏലി വർഗ്ഗത്തിൽ പെടുന്ന ജീവികളിൽ ചെറിയ അസുഖം ഉണ്ടാക്കി കളിക്കുന്നു . എലിച്ചെള്ളുകൾ ചോര കുടിക്കുമ്പോൾ ഒരു ജീവിയിൽ നിന്ന് മറ്റൊന്നിലേക്ക് പകർത്തുന്നു .

യൂറോപ്പിൽ നഗരങ്ങൾ ഉയർന്നു കഴിഞ്ഞല്ലോ . അടുത്ത് ഇസ്ലാം സംസ്കാരവുമുണ്ട് . മിഡിൽ ഈസ്റ്റിലും നഗരങ്ങൾ . ഇന്ത്യ , ചൈന ഒക്കെയുമായി കച്ചവടങ്ങൾ പൊടി പൊടിക്കുന്നു .

നഗരങ്ങൾ നല്ല വൃത്തിയും വെടിപ്പും ഉള്ള ഇടങ്ങൾ ആണോ ? അല്ല . നിറച്ചും അഴുക്കാണ് . മണം , നാറ്റം അഥവാ വാട എങ്ങും വമിക്കുന്നു . വൈസ്റ്റുകൾ കുന്നുകൂടി കിടക്കുന്നു . ഓടകളിൽ കൂടെ മലവും മൂത്രവും ഒഴുകുന്നു . കുതിര ചാണകം റോഡിൽ മൊത്തം . അതിന്റെ ഒക്കെ ഇടയിൽ കൂടി ഓടുന്നു , ചാടുന്നു , പുളക്കുന്നു , മിന്തുന്നു ?

ആര് ?

എലികൾ . ആയിരക്കണക്കിന് എലികൾ . ചില എലികളുടെ ഉള്ളിൽ ഉണ്ട് , നമ്മുടെ വില്ലൻ . യെർസീനിയ എന്ന ഏതോ ഒരു സുന്ദരിയുടെ നാമം ആണെന്ന് തോന്നുന്ന പേരുള്ള അത് .

ചില പ്രത്യേക സമയങ്ങളിൽ , നമുക്ക് അറിയാൻ പാടില്ലാത്ത കാരണങ്ങളാൽ , ഒരു ലക്കും ലഗാനുമില്ലാതെ ഇവ പെരുകുന്നു . കൂട്ടം കൂട്ടമായി എലികൾ ചത്ത് വീഴുന്നു . വിശന്നു വലഞ്ഞ ചെള്ളുകൾ മനുഷ്യരെ കടിച്ചു ചോര ഊറ്റുന്നു . യേർസ്സ്‌നിയയെ മനുഷ്യകുലത്തിന് സ്നേഹപൂർവ്വം കൈ മാറുന്നു .

കഴുത്തിലും കക്ഷത്തും ആളുകൾക്ക് മുഴ വരുന്നു . പനി , ക്ഷീണം , ചുമ . ഉള്ളിൽ നിന്ന് ചീഞ്ഞ ഒരു വാട . എലികളെപ്പോലെ മരിച്ചു വീഴുന്ന മനുഷ്യർ . അസുഖം വന്ന മുക്കാൽ പേരും മരിക്കും .

എ ഡി അറുനൂറ് തൊട്ട് എണ്ണൂറ് വരെ അനേകം പ്രാവശ്യം ഇവൻ തല പൊക്കി . അവശേഷിച്ച റോമാ സാമ്രാജ്യത്തെ നാശ കോശമാക്കി . യൂറോപ്പിലും ഏഷ്യയിലും മിഡിൽ ഈസ്റ്റിലും ഒക്കെ വീശി അടിച്ചു .

പിന്നെ പതിനാലാം നൂറ്റാണ്ടു തൊട്ട് പതിനേഴ്‌ , പതിനെട്ട് നൂറ്റാണ്ട് വരെ സാധനം പല പ്രാവശ്യം തല പൊക്കി . ഓരോ വരവിലും മിക്ക നഗരങ്ങളിലെയും പത്തുമുപ്പതു ശതമാനം ആളുകളെയും കൊന്നു തള്ളി .

ഡോക്ടർമാർ മുഖം മൂടി ഒക്കെ ധരിച്ച് , ഒരു പ്രയോജനവും ഇല്ലാത്ത പ്രതിവിധികൾ ചെയ്‌തു .

അവസാനം ആയപ്പോഴേക്കും ആളുകൾക്ക് ഇച്ചിരി ബോധം വന്നു തുടങ്ങി . എലികൾ ആണോ ഇവയുടെ വാഹകർ എന്ന സംശയം വന്നു . എലികളെ കൊന്നൊടുക്കി . നഗരങ്ങൾ വൃത്തിയാക്കി തുടങ്ങി . അസുഖം വന്ന ആളുകളെ മാറ്റി പാർപ്പിച്ചു . തുറമുഖങ്ങളിൽ ക്വറന്റീൻ ഏർപ്പെടുത്തി .

പതിനെട്ടാം നൂറ്റാണ്ട് ആയപ്പോഴേക്കും അണുക്കൾ അസുഖം ഉണ്ടാക്കും എന്ന ബോധം വന്നു തുടങ്ങി . പിന്നെ അതിന്റെ അണുവിനെ വേര്തിരിച്ചെടുത്തു . ആന്റി ബയോട്ടിക്കുകൾ ഉണ്ടായി . ഇപ്പോഴും ഈ അസുഖം ഉണ്ട് കേട്ടോ . 1994 ൽ സൂറത്തിൽ ഒന്ന് പൊട്ടി . ഇപ്പോഴും ആഫ്രിക്കയിലും മറ്റും ഇടക്ക് ഉണ്ടാവുന്നുണ്ട്.

ഈ സാമാനം ഉണ്ടാക്കിയ പ്ളേഗ് ബാധകളിൽ ഏറ്റവും ഭീകരം 1345 ഓട് കൂടി ഏഷ്യയിലും യൂറോപ്പിലും പല ഭാഗത്തായി ഉണ്ടായ ഭീകര വ്യാധി പകർച്ച ആണ് . ഏതാണ്ട് അഞ്ഞൂറ് ലക്ഷത്തോളം ആളുകൾ മരിച്ചതായി കണക്കാക്കപ്പെടുന്നു . റോഡുകളിൽ ശവശരീരങ്ങൾ കൂടി കിടന്നു . അനാഥക്കുട്ടികൾ ഭക്ഷണം കിട്ടാതെ അലഞ്ഞു നടന്നു മരിച്ചു വീണു . വീടുകളിൽ ആളുകൾ അടച്ചിരുന്നു . ചിലർ എല്ലാം ഉപേക്ഷിച്ച് ഓടി രക്ഷപ്പെടാൻ ശ്രമിച്ചു . സാധിച്ചില്ല .

നഗരങ്ങളിൽ അൻപത് ശതമാനം ഒക്കെ ആളുകൾ മരിച്ചു . എങ്ങും ഒരു മൂകത തളം കെട്ടി . കരച്ചിലുകൾ പോലും ഇല്ലാതായി .

എങ്കിലും ഒന്നുണ്ടായിരുന്നു – കൊലവിളികൾ . ആരാണ് ഇതിനു ഉത്തരവാദി? ആ അലർച്ച ഉയർന്നു .

അത് പിന്നെ അങ്ങനെ ആണല്ലോ . ആകസ്മികത എന്നൊന്ന് മനുഷ്യന് ഇഷ്ടമല്ല . ഒന്നുകിൽ ദൈവ ശിക്ഷ . അല്ലെങ്കിൽ ചെകുത്താൻ . കാളൻ , കൂളി , മറുത , ലൂസിഫർ , ജിന്ന് , യക്ഷി . അല്ലെങ്കിൽ ഡോക്ടർ, മരുന്ന് മാറി കുത്തി .

വേറൊന്നുണ്ട് . അവന്മാർ . മറ്റവർ . ശത്രുക്കൾ . കൂടോത്രം .

യൂറോപ്പിൽ ജൂതന്മാർ ആണ് അവന്മാർ . ദൈവത്തെ കൊന്നവർ . (കർത്താവ് ഒരു ജൂതൻ ആയിരുന്നു . കൊന്നത് റോമൻ ഭരണകൂടവും . എന്നിട്ട് ജൂതമാരുടെ തലയിൽ വച്ച് കെട്ടി . അത് വേറെ കഥ )

അപ്പൊ പ്ളേഗിന് കാരണക്കാർ ആരാ ? സംശയമെന്ത് ? അവന്മാർ തന്നെ . കൊല്ലെടാ അതുങ്ങളെ .

ഓടിച്ചിട്ട് പിടിച്ച് , അടിച്ചും ഇടിച്ചും , വെട്ടിയും കുത്തിയും നൂറ് കണക്കിന് ജൂതന്മാരെ കൊന്നു . സ്ത്രീകളെയും കുട്ടികളെയും കൊന്നു . അവർ തന്നെ ഇതിനൊക്കെ കാരണക്കാർ .

തെളിവുണ്ട് !

അതായത് , ചിലരെ പിടിച്ചു ഭേദ്യം ചെയ്യും . വേണ്ടാത്തിടത്ത് കമ്പുകൾ കയറ്റും . കണ്ണുകൾ കുത്തി പൊട്ടിക്കും . അങ്ങനെ പറയാൻ ബുദ്ധിമുട്ടുള്ള പലതും ചെയ്യും

. “നീയല്ലേടാ കിണറ്റിൽ വിഷം ചേർത്ത് അസുഖം പരത്തിയത് ?”

“ആണേ . ഞാനാണേ “

പോരെ ? ഞാൻ ചോദിക്കുകയാണ് . തെളിവ് പോരെ?

1349 ൽ ഫെബ്രുവരി 14 നു രണ്ടായിരം ജൂതരെ ആണ് സ്ട്രാസ്ബർഗ് എന്ന സ്ഥലത്ത് പച്ചക്ക് ചുട്ട് കൊന്നത് .

ഞാൻ പറഞ്ഞു വന്നത് എന്താണ് എന്ന് വച്ചാൽ , ആ പഴേ വിവരമില്ലാത്ത ജനത അല്ല നാമിന്ന് . അങ്ങനെ ആവരുത് . കോവിഡ് പ്ലേഗ് അല്ല . താരതമ്യേന ചെറിയ ഒരു അസുഖം ആണ് . ആര് പരത്തിയില്ലെങ്കിലും അത് പരക്കും . അതിനെ നേരിടാൻ നമുക്ക് പറ്റുകയും ചെയ്യും . ദയവ് ചെയ്ത് ജൂതരെ ആരും തിരയേണ്ട . വേണ്ട കാര്യങ്ങൾ ചെയ്യൂ (ജിമ്മി മാത്യു )

Dr Jimmy

I am a Doctor, Writer and Science Communicator. I am a member of Info- Clinic, and have written a few books. This site features my blog posts and stories. Thank you for visiting. ഞാൻ എഴുതാൻ ഇഷ്ടമുള്ള ഉള്ള ഒരു ഡോക്ടർ ആണ് . നിങ്ങളുടെ താത്പര്യത്തിന് നന്ദി .